इनरुवा, १७ साउन । सुनसरीस्थित भोक्राहा नरसिंह गाउँपालिका–२ स्थित अकहाकी एक महिलामाथि बोक्सीको आरोप लगाउँदै अभद्र व्यवहार गरेका छन्।
आरोपित महिला माथि छिमेकीहरूले घर आँगनमा माटो र फुल छरिएको तथा आफ्ना बालबालिका बिरामी परेको भन्दै बोक्सीको आरोप लगाएका हुन्।

स्थानीयहरूले सो आरोप सार्वजनिकरूपमा उठाउँदै भिड जम्मा गरी प्रदर्शन गरेपछि स्थिती तनावपूर्ण बनेको र कुनै अप्रिय घटना हुन नदिन सुरक्षाकर्मी परिचालन गरिएको जनाइएको छ। जिल्ला प्रहरी कार्यालय तथा सशस्त्र प्रहरी बलको टोलीले घटनास्थलमा पुगेर विवाद नियन्त्रणमा लिएको छ ।

विवाद थप चर्किन नदिन र पीडित महिलाको सुरक्षाको लागि उनलाई हाल जिल्ला प्रहरी कार्यालय सुनसरीमा राखिएको प्रहरी स्रोतले जानकारी दिएको छ। घटनाको बिषयमा थप अनुसन्धान भइरहेको प्रहरीले जनाएको छ।