इनरुवा, २५ कार्तिक । सुनसरीको हरिनगर गाउँपालिका–१ सुनसरी खोला नजिक आज दिउँसो ट्रक र मोटरसाइकल आपसमा ठोक्किँदा एक जनाको मृत्यु भएको छ । दुर्घटनामा मोटरसाइकलमा सवार एक महिलाको घटनास्थलमै मृत्यु भएको प्रहरीले जनाएको छ ।
मालवहाक ट्रक (प्र १- ०२- ००१ख ९२०७) र नम्बर नखुलेको मोटरसाइकल एकआपसमा ठोक्किँदा उक्त घटना भएको हो । दुर्घटनामा मोटरसाइकल चालक भोक्राहा नरसिंह गाउँपालिका–४ का ४० वर्षीय लक्ष्मण मेहता घाइते भएका छन् ।
घाइते मेहताको स्थानीय स्वास्थ्य संस्थामा उपचार भइरहेको छ भने मृतक महिलाको सनाखत अझै हुन बाँकी छ ।
प्रहरीले ट्रक र चालकलाई नियन्त्रणमा लिएर थप अनुसन्धान भइरहेको जनाएको छ ।