इनरुवा, १९ कार्तिक । रौतहट प्रहरीले स्रोत नखुलेको ४४ लाख ६४ हजार ६०५ रुपैयाँसहित दुई जनालाई नियन्त्रणमा लिएको छ।

जिल्लाको ईशनाथ नगरपालिका–४ मा भारतबाट मोटरसाइकलको फल्स बटममा लुकाएर नेपालतर्फ ल्याउँदै गरेको अवस्थामा ३० लाख रुपैयाँसहित भारतीय नागरिक सनि कुमार जैसवाललाई प्रहरीले नियन्त्रणमा लिएको हो।

जैसवालको बयानका आधारमा प्रहरीले सदरमुकाम गौरस्थित ‘न्यु तराई ट्रेडर्स’का सञ्चालक शेख कमरुललाई पनि थप १४ लाख ६४ हजार ६०५ रुपैयाँसहित नियन्त्रणमा लिएको जनाएको छ।

प्रहरीका अनुसार दुवै स्थानबाट गरी जम्मा ४४ लाख ६४ हजार ६०५ रुपैयाँ बरामद भएको छ। पक्राउ परेका दुवै जनालाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ।