इनरुवा, ७ फागुन । इनरुवाका पत्रकार गणेशकुमार यादवमाथि भएको कुटपिट घटनाप्रति नेपाल पत्रकार महासंघ ले कडा शब्दमा निन्दा गर्दै दोषीमाथि कडा कारबाहीको माग गरेको छ।

महासंघ सुनसरी शाखाले प्रेस वक्तव्य जारी गर्दै समाचार संकलनका क्रममा पत्रकारमाथि भएको आक्रमणप्रति गम्भीर ध्यानाकर्षण भएको जनाएको छ। निर्वाचनका दौरान समाचार संकलनको क्रममा भएको यस्तो घटनाले नागरिकको सत्य–तथ्य सूचना पाउने अधिकार कुण्ठित हुने महासंघको भनाइ छ।

वक्तव्यमा दोषी व्यक्तिहरूमाथि तत्काल निष्पक्ष छानबिन गरी कानुनी कारबाही गर्न सम्बन्धित निकायसँग माग गरिएको छ। साथै पत्रकारलाई निर्वाध रूपमा आफ्नो पेशागत दायित्व निर्वाह गर्ने सुरक्षित वातावरण सुनिश्चित गर्न प्रशासनसँग आग्रह गरिएको छ।