इनरुवा, ११ बैशाख । सशस्त्र प्रहरी बल, नेपालले सुनसरीको देवानगञ्ज गाउँपालिका १ स्थित मध्यहर्षाही क्षेत्रबाट मोटरसाइकलसहित ठूलो परिमाणमा अवैध सामान बरामद गरेको छ।

आज बिहान सीमा सुरक्षा गुल्म कप्तानगञ्जबाट सशस्त्र प्रहरी नायब निरीक्षक रमेश कुमार बोहोराको कमाण्डमा खटिएको १० सदस्यीय मोबाइल गस्ती टोलीले भारतबाट भन्सार छली गरी नेपालतर्फ ल्याइँदै गरेको सामान नियन्त्रणमा लिएको हो।

गस्ती टोलीलाई देख्नेबित्तिकै को १३ प ७१३४ र BR 39Y 0322 नम्बरका दुई वटा मोटरसाइकल छाडेर संलग्न व्यक्तिहरू फरार भएका थिए। उनीहरूको खोजी कार्य जारी रहेको प्रहरीले जनाएको छ।

बरामद गरिएका सामानहरूमा अन्दाजी रु. सात लाख ३० हजार बराबरका डबल बेडका तन्ना सेट १२० थान, वाईफाई राउटर तथा चार्जर १०० थान, नक्कली गहना ३०० पिस र ४ बोरा सुर्ती रहेका छन्। साथै, दुई वटा मोटरसाइकलको अन्दाजी मूल्य रु. दुई लाख रहेको छ।

यसरी जम्मा अन्दाजी मूल्य रु. नौ लाख ३०हजार बराबरका अवैध सामान नियन्त्रणमा लिइएको सशस्त्र प्रहरीले जनाएको छ।