इनरुवा, ६ भाद्र । विधालय शिक्षा विधेयक प्रति असन्तुष्टि जनाउँदै निजी विद्यालयहरुले स्कुल बस इनरुवा नगरपालिका परिक्रमा गराएको छ।
विधालय शिक्षा विधेयकमा निजी विद्यालय बन्द गर्ने गरी नीति ल्याउन लागिएको भन्दै विरोध स्वरुप इनरूवा प्याब्सनले खाली स्कुल बसको परिक्रमा गराएको हो । केन्द्रीय आन्दोलन तालिका अनुसार इनरूवा नगर प्याब्सन सुनसरीले विद्यालयका खाली स्कुल बस इनरुवा परिक्रमा गराएर बिरोध जनाएको हो । नगरपालिका रोड, शान्तिचोक, सखुवागाछी, हाईवे, प्रहरी रोड, मूख्यबजार हुँदै जिसस रोड भएर शिक्षा समन्वय तथा विकास इकाई, विपी चोक हुँदै सीबी सिनेमा रोड, महानन्द पार्क सम्मको परिक्रमा गरिएको थियो ।
विधेयकप्रति असन्तुष्टि जनाउँदै निजी विद्यालय सञ्चालकहरूले समेत आन्दोलित भैसकेको छन् । उनीहरूले भदौ ५ बाटै आन्दोलन थालेका हुन् ।
निजी विद्यालय सञ्चालक संस्था प्याब्सन, एनप्याब्सन, हिसान र अपेनले विधेयकमा रहेको निजी विद्यालयलाई गैरनाफामूलक बनाउने र १०–१५ प्रतिशत पूर्ण छात्रवृत्ति दिनुपर्ने प्रावधानको विरोध गरेका हुन् ।
उनीहरूले कम्पनी ऐनअन्तर्गत दर्ता भएका विद्यालयलाई गैरनाफामूलक बनाउने प्रावधान हटाउन, छात्रवृत्तिमा पोसाक, स्टेसनरी र खाजा समावेश गर्न र छात्रवृत्तिको अधिकार स्थानीय तहबाट विद्यालयलाई दिन माग गरेका छन् ।
आफ्ना माग सम्बोधन नभए भदौ ८ बाट निर्णायक आन्दोलन गर्ने तयारीमा निजी विद्यालय सञ्चालकहरू रहेका छन् ।
विधेयकमा समितिले निजी विद्यालयलाई क्रमशः गैरनाफामूलक बनाउने र २.५ प्रतिशतले विद्यार्थीलाई आवास सुविधा दिने प्रस्तावमा सहमति जुटाएको थियो ।