विराटनगर, १० भाद्र । कोशी प्रदेशका मुख्यमन्त्री हिक्मत कुमार कार्कीले प्रदेशसभामा रहेको आम सञ्चार विधेयकका विषयमा सरोकारवालाहरुको चासो प्रति गम्भिर रहेको र थप छलफल आवश्यक रहेको बताएका छन् ।
मगलवार नेपाल पत्रकार महासङ्घ कोशी प्रदेशको ज्ञापन पत्र बुझ्दै कार्कीले विधेयकको विषयमा सरोकारवालाहरुको चासो प्रति गम्भिर रहेको थप छलफल गर्ने बताएका हुन् ।
कार्कीले संसद् भित्र प्रवेश गरिसकेको विषय सरकारको मात्रै विषय नभएकोले सरोकारवाला दलहरूसँग छलफल गरेर अगाडि बढ्ने बताए । मुख्यमन्त्री कार्कीले आफू कोशी प्रदेशमा आएदेखि नै पत्रकारहरूको एउटा दर्बिलो संस्था बनाउने इच्छा रहेको उल्लेख गर्दै कानुन मार्फत नै संस्था बनाएर काम गर्ने सोचअनुरूप यो विधेयक ल्याएको जानकारी दिए ।
कोशीको न्याय, प्रशासन तथा विधायन समितिले प्रतिवेदन पेस गरेपछि पारित हुने चरणमा रहेको विधेयकमा प्रेस स्वतन्त्रता विरोधी प्रावधानहरू रहेको भन्दै महासंघ सहितका संघसंस्था आन्दोलित बनेका छन्।
कार्कीले आफू आन्तरिक मामिला तथा कानुन मन्त्रालयमा हुँदा बनेको संस्था बिचैमा खारेज हुँदा सरोकारवाला हरू मौन रहेकाले त्यसलाई परिपूर्ति गर्न कानुन मार्फत नै प्रयत्न गरेको स्मरण गर्दै अहिले प्रदेश सभामा भएको विधेयकमा देखिएका विषयलाई छलफलका माध्यमबाट समाधान गरिने प्रयत्न गर्ने जानकारी दिए ।