इनरुवा, ८ पुस । सुनसरीको हरिनगर गाउँपालिका–१ रामनगर भुटाहा स्थित मदरसा इजहारुल उलुस चपडाहीको गेट नजिक मोटरसाइकलको ठक्करबाट घाइते भएका दुई जनामध्ये एक जनाको उपचारका क्रममा मृत्यु भएको छ।

दुर्घटनामा घाइते दुवैलाई उपचारका लागि विराटनगरस्थित गोल्डेन अस्पताल लगिएको थियो । उपचारकै क्रममा एक जनाको मृत्यु भएको प्रहरीले जनाएको छ । मृतकको हालसम्म पहिचान खुलेको छैन।

दुर्घटनामा संलग्न मोटरसाइकल हरिनगर गाउँपालिका–१ रामनगर भुटाहाका निसान अंसारीले चलाएको प्र.१–०२–०४८ प ८०५५ नम्बरको रहेको जनाइएको छ।

स्थानीयका अनुसार पहिचान नखुलेका व्यक्तिको उपचारका क्रममा मृत्यु भएको हो । दुर्घटनाबारे थप अनुसन्धान भइरहेको प्रहरीले जनाएको छ।