काठमाडौं, ९ पुस । उज्यालो नेपाल पार्टी (उनेपा) र सर्वोदय पार्टी (सपा)बीच चुनावी एकता भएको छ। बुधबार काठमाडौंमा आयोजित संयुक्त कार्यक्रममा दुई दलले औपचारिक रूपमा चुनावी एकताको घोषणा गरेका हुन्।
दुवै पार्टीले आपसी सहमतिअनुसार उज्यालो नेपाल पार्टीको चुनाव चिह्न ‘बलेको चिम’ प्रयोग गरी संयुक्त रूपमा आगामी निर्वाचनमा सहभागी हुने निर्णय गरेका छन्।

उनेपाका अध्यक्ष अनुपकुमार उपाध्याय र सपाका अध्यक्ष दीपककुमार साहबीच चुनावी एकताको सहमतिमा हस्ताक्षर भएको हो। ऊर्जा मन्त्री कुलमान घिसिङसमेत संरक्षक रहेको दाबी गरिएको उज्यालो नेपाल पार्टी गत मंसिर १७ गते औपचारिक रूपमा घोषणा गरिएको थियो।
यसैगरी, जनमत पार्टी विभाजनपछि दीपककुमार साहले जनस्वराज पार्टी गठन गरेका थिए। सोही पार्टी पछि निर्वाचन आयोगमा सर्वोदय पार्टीका रूपमा दर्ता भएको हो।