इनरुवा, १९ भदौ । रसुवामा आएको बाढीपहिरोपछि सम्पर्कविहीन भएका सुनसरीका व्यक्तिहरूमध्ये ६ जना सम्पर्कमा आएको जिल्ला प्रशासन कार्यालय सुनसरीले जनाएको छ।

प्रशासनका अनुसार रसुवा बाढीपहिरोमा सुनसरीका जम्मा २१ जना बेपत्ता भएको विवरण प्राप्त भएको थियो। तीमध्ये ६ जना परिवार तथा आफन्तको सम्पर्कमा आएका छन् भने अझै १५ जना सम्पर्कविहीन रहेको प्रशासनले जनाएको छ।

जिल्ला प्रशासन कार्यालय सुनसरीले बाढीपहिरोपछि हराएका तथा सम्पर्कमा आएका व्यक्तिहरूको विवरण संकलन गरी सार्वजनिक गरिरहेको जनाएको छ। प्रशासनले सम्पर्कविहीन व्यक्तिबारे कुनै जानकारी प्राप्त भएमा सम्बन्धित परिवार, स्थानीय तह वा प्रशासन कार्यालयलाई जानकारी गराउन आग्रह गरेको छ।