इनरुवा, २२ असार । भोजपुरमा गएराति एकै परिवारका चार जनाको सामूहिक हत्या भएको छ। घटनामा एकजना गम्भीर घाइते भएका छन्।
रामप्रसाद राई गाउँपालिका–२ को धोद्लेखानी बोन्थिताङमा चार जनाको सामूहिक हत्या भएको अवस्थामा आइतबार बिहान शव फेला परेको प्रहरीले जनाएको छ।

पारिवारिक विवादका कारण एकै परिवारका चार जनाको हत्या भएको प्रारम्भिक अनुसन्धानको क्रममा खुलेको जिल्ला प्रहरी कार्यालय भोजपुरका प्रहरी निरीक्षक दीपक श्रेष्ठले जानकारी दिए।
श्रेष्ठका अनुसार भोजपुर नगरपालिका–२ बस्ने ३० वर्षीय राजेन्द्र राईले आफ्नै ससुरालीमा गएर परिवारका चार जनालाई धारिलो हतियार प्रयोग गरी हत्या गरेका हुन्।
हतियार प्रहारबाट मृत्यु हुनेमा राजेन्द्रकी श्रीमती, सासु ४५ वर्षीया मञ्जु गिरि, ससुरा ६८ वर्षीय बेलबहादुर गिरि र सालो रहेका छन्।

घटनापछि आफैँले हतियार प्रयोग गर्दा राजेन्द्र राई पनि गम्भीर घाइते भएका छन्। उनलाई तत्काल उद्धार गरी उपचार भईरहेको प्रहरीले जनाएको छ।
‘घटना गएराति सवा १ बजेतिर भएको हो,’ प्रहरी निरीक्षक श्रेष्ठले भने, ‘प्रारम्भिक अनुसन्धानका क्रममा राजेन्द्र राई ससुराली गएका बेला विवाद चर्किएपछि उनले मध्यराति धारिलो हतियारले पत्नीसहित ससुराली पक्षमाथि आक्रमण गरेको खुलेको छ ।’
प्रहरीले घटनाको बिषयमा थप अनुसन्धान भईरहेको प्रहरीले जनाएको छ ।