इनरुवा, २७ असार । सुनसरी जिल्ला अदालतले चालु आर्थिक वर्षमा लक्ष्यको करिब ९० प्रतिशत मुद्दा फछ्र्यौट गरेको छ ।
शुक्रवार अदालतमा पत्रकार भेटघाट कार्यक्रममा सुनसरी जिल्ला अदालतका श्रेष्तेदार टिकेन्द्रवीरजंग राणाले कुल लक्ष्यको करिब ९० प्रतिशत अथवा ८९ दशमलव १८ प्रतिशत मुद्दा फछ्र्यौट गर्न सफल भएको जानकारी दिए ।
चालु वर्षमा दर्ता भएका १० हजार १६ वटा मुद्दा मध्ये ५ हजार ९ सय ९३ मुद्दा फछ्र्यौट भएको सुनसरी जिल्ला अदालतले जानकारी दिएको छ । यसमा अघिल्लो आर्थिक वर्षबाट ४ हजार १ सय ४६ मुद्दा दायित्व सरेर आएको अदालतले जनाएको छ । अदालतले अब ३ हजार ९ सय १४ मुद्दा फैसला गर्न बाँकी रहेको छ ।
सुनसरी जिल्ला अदालतमा पहिलो पटक यत्तिको धेरै सङ्ख्यामा मुद्दा दर्ता भएर फछ्र्यौट भएको राणाले बताए ।
अदालतमा दर्ता हुने मुद्दा मध्ये सबैभन्दा बढी सम्बन्ध विच्छेदको मुद्दा रहेको श्रेष्तेदार राणाले जानकारी दिए । उनका अनुसार चालु आर्थिक वर्षमा मात्रै सम्बन्ध बिच्छेदका १ हजार २ सय १६ मुद्दा दर्ता भए । जसमध्ये १ हजार २ सय सम्बन्ध बिच्छेदका मुद्दा फछ्र्यौट भएको श्रेष्तेदार राणाले बताए ।
सम्बन्ध विच्छेद पछि लागु औषध, बैकिंङ कसुर र जबरजस्ती करणीको मुद्दा तुलनात्मक रूपमा बढी मात्रामा दर्ता भएको अदालतले जनाएको छ ।