इनरुवा, २० साउन । भारत उत्तराखण्डको उत्तरकाशा जिल्लाको धराली गाउँमा क्लाउड बस्र्ट पछि आएको बाढीले ठूलो क्षति पु¥याएको छ । भीषण वर्षापछि खीरगंगा नदीमा आएको बाढीले गंगोत्री मार्गमा पर्ने धराली बजार तहसनहस बनाएको छ । घटनामा चार जनाको मृत्यु भएको पुष्टि भएको छ ।

मंगलबार आरिघोप्टे वर्षापछि खोलामा एक्कासी ठूलो बाढी आएको थियो । बाढी गाउँतिर पस्नेबित्तिकै स्थानीय बासिन्दाहरूमा त्रास फैलिएको थियो । बाढीले धराली बजार पूर्ण रूपमा तहस–नहस बनाएको छ भने धेरै होटल र पसलहरू ध्वस्त भएका छन् ।

भारतीय समय अनुसार मंगलबार १ बजेर ३० मिनेटमा आएको बाढीले धराली बजारका धेरै घर पुरिएको र केही घरहरु बगेका छन् ।

यस्तै, यमुनोत्री राजमार्गको स्यानाचट्टी नजिकै झन्डै २५ मिटर सडक भासिएको छ । उक्त क्षेत्रबाट ठूलो चट्टान खसेपछि यातायात पूर्ण रूपमा बन्द भएको छ ।