इनरुवा, ३ भाद्र । गौर घटनामा जोडेर पार्टी अध्यक्ष उपर अनुसन्धान थाल्न दिएको आदेशको विषयमा जसपा नेपाल सुनसरीले आपत्ति जनाउदै विरोध प्रर्दशन गरेको छ ।
जसपा नेपाल सुनसरीले गौर हत्याकाण्डका विषयमा अदालतले गरेको आदेश विरुद्ध सुनसरी सदरमुकाम इनरुवामा विरोध प्रदर्शन गरेको हो ।

विरोध प्रर्दशन गर्दै राजनीतिक स्वार्थ पूरा हुन नसकेपछि सरकारको तर्फबाट सुनियोजित तवरले पार्टी केन्द्रीय अध्यक्षलाई फसाउन खोजिएको जसपा नेपाल सुनसरी अध्यक्ष देवकृष्ण यादवले दाबी गरे । उनले सरकारले आफ्ना गतिविधि नसच्याए आन्दोलनमा उत्रिने जिल्ला पार्टी पंक्ति तयार रहेको बताए ।

२०६३ को चैत्र ७ गते रौटहटको गौरस्थित राईसमिलको चौरमा भएको झडपमा माओवादीका २७ जना कार्यकर्ता मारिएका थिए भने सयभन्दा बढी घाइते भएका थिए । त्यो दिन मधेसी जनअधिकार फोरम र माओवादीले एकै समयमा एकै ठाँउ कार्यक्रम आयोजना गरेका थिए । त्रिभुवन साहले २०८० साल जेठ २१ गते सर्वोच्चमा मुद्दा दायर गरेका थिए ।