इनरुवा, १ कार्तिक । आईसीसी टी–द्वान्टी विश्वकप एसिया र इस्ट एसिया प्यासिफिक छनोेट खेलमा सामोआलाई पराजित गर्दै नेपाल आईसीसी टी–२० विश्वकप एसिया तथा इस्ट एसिया पेसिफिक छनोट खेलमा च्याम्पियन बनको छ ।
शुक्रबारको खेलमा सामोआलाई पराजित गर्दै नेपाल आईसीसी टी–२० विश्वकप एसिया तथा इस्ट एसिया पेसिफिक छनोटको च्याम्पियन बनेको हो । च्याम्पियन बनेका नेपाली क्रिकेट टोलीका सबैले जनही १९ लाख ५० हजार रुपैयाँ पुरस्कार पाउने भएका छन् ।
विश्वकप छनोट खेलेको नेपाली टोलीका खेलाडीमा रोहितकुमार पौडेल (कप्तान), दीपेन्द्रसिंह ऐरी (उपकप्तान), कुशल भुर्तेल, लोकेस बम, कुशल मल्ल, आसिफ सेख, आदिल अन्सारी, करण केसी, नन्दन यादव, सन्दीप लामिछाने, सन्दीप जोरा, आरिफ सेख, ललितनारायण राजवंशी, गुलशन झा र सोमपाल कामी छन्।
राष्ट्रिय खेलकुद परिषसदका सदस्य सचिव टंकलाल घिसिङले छनौट खेल जितेको नेपाली क्रिकेट टिममा सबै सदस्यले उक्त पुरस्कार प्राप्त गर्ने जानकारकी दिएका छन् । विश्वकपमा छनोट हुने र छनोट प्रतियोगितामा च्याम्पियन हुने टोलीलाई पुरस्कार दिने घोषणा यसअघि नै भइसकेको उनको भनाइ छ ।
घिसिङले खेलकुद विकास नियमावली २०७९ अनुसार सो पुरस्कार रकम दिइने बताए । घिसिङकै कार्यकालमा ल्याइएको खेलकुद विकास नियमावलीमा खेलाडीहरूलाई प्रदान गरिने पुरस्कारलाई व्यवस्थित गरिएको थियो ।
कस्तो प्रतियोगिता जितेमा खेलाडी र प्रशिक्षकलाई कति पुरस्कार दिने भन्ने नियमावलीमै उल्लेख छ । नियमावलीको अनुसूची ४ अन्तरगतको व्यवस्था अनुसार यदि नेपालले विश्वकप नै जितेको खण्डमा खेलाडीले जनही ५२ लाख ५० हजार रुपैयाँ पाउँछन् ।
यस्तै, उपविजेता भएको खण्डमा जनही २६ लाख र तेस्रो भएमा १९ लाख ५० हजार दिने व्यवस्था छ । विश्वकप छनोट प्रतियोगितामा पहिलो भएको अवस्थामा पनि प्रत्येक खेलाडीले १९ लाख ५० हजार पाउने व्यवस्था गरिएको छ ।
दोस्रो भएमा १३ लाख र तेस्रो भएमा ९ लाख १० हजार पाउँने व्यवस्था छ । नियमावली अनुसार २०२४ को विश्वकप छनोट प्रतियोगितामा नेपाल दोस्रो हुँदा खेलाडीले १३ लाख जनही पाएका थिए ।
छनोट प्रतियोगिताको उपाधि जितेर प्रमुख प्रशिक्षकले ६ लाख २५ हजार, सहायक प्रशिक्षक, फिजियो र अफिसियललाई ३ लाख २५ हजार दिइने भएको छ । दोस्रो भएमा प्रमुख प्रशिक्षकले ३ लाख ९० हजार र अफिसियलहरुले एक लाख ९१ हजार रुपैयाँ प्राप्त गर्ने थिए ।
प्रतियोगिताको उपाधि जित्नेकोले नेपाल क्रिकेट संघ (क्यान) ले पनि ६ लाख ५० हजार रुपैयाँ पाउनेछ । दोस्रो हुँदा ३ लाख ९० हजार र तेस्रो भएमा २ लाख ६० हजार रुपैयाँ प्राप्त गर्ने व्यवस्था नियमावलीमा गरिएको छ ।
नेपालले ११ वर्षपछि पहिलोपटक आईसीसीको प्रतियोगितामा उपाधि जितेको हो । यसअघि सन् २०२३ मा विश्वकप छनोटमा नेपाल फाइनलमा ओमानसँग सुपर ओभरमा पराजित भएको थियो ।
नेपालले सन् २०२६ मा भारत र श्रीलंकामा हुने टि–२० विश्वकपमा तेस्रो पटक भाग लिने भएको छ । नेपालले यसअघि २०१४ र २०२४ मा विश्व कप खेलेको थियो ।