नेपालको हालको राजनीतिक परिदृश्यमा “जेनजी आन्दोलन” नामले चिनिने नयाँ पुस्ताको जागरण एक महत्वपूर्ण चरणमा पुगेको छ। यो आन्दोलन केवल सामाजिक माध्यममा सीमित नरही सडकसम्म फैलिएको छ, जसले पुरानो राजनीतिक संस्कृतिप्रति युवापुस्ताको असन्तुष्टि र परिवर्तनको आकांक्षा प्रष्ट रूपमा झल्काउँछ।
जेनजी आन्दोलनको मूल स्वरूप राजनीति, नेतृत्व र शासन प्रणालीमा उत्तरदायित्व खोज्ने युवाको आवाज हो। परम्परागत पार्टी नेतृत्वमा मौजुद भ्रष्टाचार, शक्ति–संघर्ष र असफल शासनशैलीप्रति असहमति जनाउँदै यो आन्दोलन अघि बढेको छ। सामाजिक सञ्जालमा सुरु भएको आलोचनाले अहिले राजनीतिक चेतनाको रूप लिँदै स्थायित्व, पारदर्शिता र नीतिगत सुधारको माग अघि सारेको छ।
यसैबीच, केपी शर्मा ओलीको बर्हिगमनलाई पनि यही नयाँ चेतनासँग जोडेर हेरिने गरेको छ। ओलीको शासनकालमा जनअपेक्षा अनुसारको सुधार नआउनु, पार्टीभित्रको गुटबन्दी र नेतृत्वशैलीप्रति असन्तुष्टि बढ्नु मुख्य कारणका रूपमा देखिन्छ। विगतका लोकप्रिय निर्णय र भाषणहरूले उनलाई करिश्माई नेता बनाएको भए पनि पछिल्ला वर्षमा जनसमर्थनमा आएको गिरावटले उनीमाथिको राजनीतिक दबाब बढाएको हो।
जेनजी आन्दोलनले देखाएको जनभावनाले स्पष्ट सन्देश दिएको छ, अब राजनीति पुरानो ढर्रामा चल्दैन। नयाँ पुस्ता पारदर्शिता, जवाफदेहिता र परिणाममुखी शासन चाहन्छ। केपी ओलीको बर्हिगमन त्यस परिवर्तनको संकेत हो, जहाँ व्यक्तिगत प्रभावभन्दा संस्थागत सुधार र वैकल्पिक सोचको माग बढ्दै गएको छ।

राजनीतिक जीवनमा उतारचढाव स्वाभाविक कुरा हो । तर हालका दिनमा नेकपा (एमाले)का अध्यक्ष तथा पूर्व प्रधानमन्त्री केपी शर्मा ओलीको मनस्थिती निकै हतास देखिए पनि, उनले त्यसलाई सार्वजनिक रूपमा झल्किन नदिने प्रयास गरिरहेका छन् ।
पछिल्ला केही राजनीतिक घटनाक्रमले ओलीको राजनीतिक वर्चस्वमा चुनौती देखिएको छ । पार्टीभित्र नेतृत्वको वैकल्पिक सम्भावना खोज्ने आवाजहरू उठिरहेका छन् । पूर्व सहकर्मीहरूकै आलोचना, पार्टीको संगठनात्मक कमजोरी र आगामी निर्वाचनका समीकरणले उनको आत्मविश्वासमा असर पारेको देखिन्छ । तर, ओली अझै पनि आत्मबल उच्च देखाउन खोजिरहेका छन् । भाषणमा आत्मविश्वासका साथ बोल्ने, पार्टीभित्र ‘सब ठिकै छ’ भन्ने सन्देश दिने र बाहिर विरोधी शक्तिलाई आक्रमण गर्ने शैलीले उनी आफ्नो अस्थिर मानसिक अवस्थालाई लुकाउने प्रयास गरिरहेका छन् ।
उनको राजनीतिक जीवनमा यस्तो हतासपन पहिले पनि देखा परेको थियो, विशेष गरी प्रधानमन्त्री पद गुमाएपछिका दिनहरूमा । तर हरेक पटक उनी आफ्नो करिश्मा र भाषणशैलीबाट पुनः अग्रभागमा फर्किन सफल भएका थिए । अहिले पनि त्यही प्रयास दोहोर्याइरहेका छन्, तर समय र परिस्थितिले उनलाई पहिलेको जस्तो सहज मौका दिने अवस्था भने देखिँदैन ।
पार्टीभित्रको असन्तुष्टि, नयाँ पुस्ताको अपेक्षा र गठबन्धनको जटिल समीकरणबीच ओलीले सन्तुलन कायम गर्न कठिनाइ भोगिरहेका छन् । तर सार्वजनिक रूपमा उनले आफूमाथि कुनै दबाब छैन भन्ने देखाउन चाहन्छन्, जसले गर्दा उनको हतास मनस्थिती झन् स्पष्ट झल्किन्छ ।
राजनीतिमा अनुशासन, सहकार्य र नेतृत्व क्षमताको परीक्षा अहिले ओलीमाथि छ । समयले देखाउनेछ, उनी पुनः पहिलेजस्तै सशक्त नेताको रूपमा उदाउँछन् कि हतास मनस्थितीमै सीमित रहन्छन् ।