इनरुवा, २३ मंसिर । सरकारले चालु आर्थिक वर्ष २०८२।८३ का लागि उखुको न्यूनतम समर्थन मूल्य निर्धारण गरेको छ। सोमबार बसेको मन्त्रिपरिषद् बैठकले उखुको प्रतिक्विन्टल ६ सय २० रुपैयाँ खरिद मूल्य तोक्ने निर्णय गरेको हो।

सरकारका प्रवक्तासमेत रहेका सञ्चारमन्त्री जगदीश खरेलका अनुसार किसानलाई अतिरिक्त राहतस्वरूप प्रतिक्विन्टल ७० रुपैयाँ अनुदान उपलब्ध गराइनेछ। उनले उखु किसानको उत्पादन लागत, बजार मूल्य तथा चिनी उद्योगहरुको अवस्थालाई आधार मानेर समर्थन मूल्य तोकिएको जानकारी दिए।

सरकारले हरेक वर्ष जस्तै यस वर्ष पनि उखु कृषकको आय सुरक्षित गर्न, उखु खेतीलाई प्रोत्साहन दिन तथा चिनी उद्योग र किसानबीच सम्भावित मूल्य विवाद रोक्न न्यूनतम समर्थन मूल्य तोक्ने गरेको छ।