इनरुवा, १४ पुस । अशोक राई नेतृत्वको जनता समाजवादी पार्टी (जसपा), राजेन्द्र महतो नेतृत्वको राष्ट्रिय मुक्ति पार्टी र रेशमलाल चौधरी संरक्षक रहेको नागरिक उन्मुक्ति पार्टी नेपालले आगामी निर्वाचनमा एउटै चुनाव चिह्न ‘जाँतो’ प्रयोग गरेर उम्मेदवारी दिने भएका छन्।

तीनवटै दलले नागरिक उन्मुक्ति पार्टी नेपालको ‘जाँतो’ चिह्नमा समानुपातिक तर्फको बन्द सूची बुझाउने निर्णय गरेका छन्। यसअघि नै निर्वाचन आयोगमा तीनवटै पार्टीले एकल चुनाव चिह्न ‘जाँतो’ रहने गरी दल दर्ता गराइसकेका थिए।

जसपा नेतृ सुशीला श्रेष्ठले तीन दलबीच सहमति भइसकेको उल्लेख गर्दै भनिन्, “हामीले एउटै चुनाव चिह्नमा समानुपातिक बन्द सूची बुझाउने निर्णय गरेका छौँ।”

तीन दलबीचको यो सहकार्यलाई मधेश तथा पहिचानमुखी राजनीतिक एकताका रूपमा हेरिएको छ। संयुक्त चुनावी रणनीतिले आगामी निर्वाचनमा प्रभाव बढाउने अपेक्षा गरिएको छ।