इनरुवा, १५ जेठ । सरकारले आगामी आर्थिक वर्ष २०८३/०८४ का लागि २१ खर्ब २४ अर्ब ३४ करोड रुपैयाँ बराबरको बजेट सार्वजनिक गरेको छ ।
अर्थमन्त्री डा. स्वर्णिम वाग्ले ले शुक्रबार संघीय संसद्मा बजेट प्रस्तुत गरेका हुन् ।
कूल बजेटमध्ये चालुतर्फ १२ खर्ब ७० अर्ब ५८ करोड रुपैयाँ (५९.८ प्रतिशत), पुँजीगततर्फ ४ खर्ब ३१ अर्ब १० करोड रुपैयाँ (२०.३ प्रतिशत) तथा वित्तीय व्यवस्थापनतर्फ ४ खर्ब २२ अर्ब ६४ करोड रुपैयाँ (१९.९ प्रतिशत) विनियोजन गरिएको छ ।
सरकारले ल्याएको यो बजेट चालु आर्थिक वर्षको संशोधित बजेटको तुलनामा करिब २५ प्रतिशतले बढी रहेको जनाएको छ ।
यस्तै, आगामी आर्थिक वर्षमा १४ खर्ब ४ अर्ब रुपैयाँ राजस्व संकलन हुने अनुमान गरिएको छ । अनुदानतर्फ ६१ अर्ब ७४ करोड रुपैयाँ, वैदेशिक ऋणतर्फ २ खर्ब ४७ अर्ब रुपैयाँ तथा आन्तरिक ऋणतर्फ ४ खर्ब १० अर्ब रुपैयाँ उठाइने अर्थमन्त्रीले बताएका छन् ।