इनरुवा, १ साउन। जिल्ला प्रहरी कार्यालय सुनसरीले आर्थिक वर्ष २०८२/०८३ मा ६६ हजार २२८ जना नागरिकलाई विभिन्न सेवा प्रदान गरेको जनाएको छ।
बिहीबार इनरुवामा आयोजित पत्रकार सम्मेलनमा वार्षिक प्रतिवेदन सार्वजनिक गर्दै सुनसरीका प्रहरी उपरीक्षक (एसपी) केशवकुमार थेबेले जिल्ला प्रहरी कार्यालयअन्तर्गतको नागरिक सहायता कक्षमार्फत उक्त सङ्ख्यामा सेवाग्राहीले सेवा लिएको जानकारी दिए।
उनका अनुसार सेवा लिनेमध्ये ३४ हजार ८६२ जना पुरुष, २६ हजार १६ जना महिला, ३ हजार ३१ जना बालबालिका, २ हजार १२० जना ज्येष्ठ नागरिक तथा १९९ जना अशक्त रहेका छन्।
एसपी थेबेले नागरिक सहायता कक्षबाट सेवा लिनेमध्ये महिलाको उपस्थिति उल्लेखनीय रहेको बताए।
त्यसैगरी, आर्थिक वर्ष २०८२/०८३ मा सुनसरीमा घरेलु हिंसासम्बन्धी ६९५ वटा उजुरी दर्ता भएकोमा सबै उजुरी फर्छ्योट गरिएको प्रहरीले जनाएको छ।
दुवै पक्षबीचको छलफल र आपसी सहमतिका आधारमा सबै ६९५ वटै उजुरी मिलापत्रमार्फत टुंगो लगाइएको एसपी थेबेले जानकारी दिए।