इनरुवा, २३ असोज । सुनसरीको बराहक्षेत्र नगरपालिका–३ नडाहा चोकबाट लागूऔषध ट्याब्लेट, क्याप्सुल र मोटरसाइकलसहित एक जना पक्राउ परेका छन्।

जिल्ला प्रहरी कार्यालय सुनसरीका अनुसार बिहीबार दिउँसो कान्छीचोकबाट उदयपुरतर्फ जाँदै गरेको प्रदेश ३–०२–००३ प २५९३ नम्बरको मोटरसाइकललाई शंका लागेर रोक्ने क्रममा मोटरसाइकल चालक फरार भएका थिए।

मोटरसाइकलमा पछाडि सवार बराहक्षेत्र नगरपालिका–३ का ३० वर्षीय अनुश मगरलाई चेकजाँच गर्दा उनको साथबाट DICYCLOMINE नामक १ हजार ३ सय ९० ट्याब्लेट र TRAMADOL नामक १ हजार ३ सय ९० क्याप्सुल बरामद भएको प्रहरीले जनाएको छ।

प्रहरीले लागूऔषध र मोटरसाइकलसहित मगरलाई नियन्त्रणमा लिएर इलाका प्रहरी कार्यालय महेन्द्रनगरमा राखी थप अनुसन्धान गरिरहेको छ। फरार मोटरसाइकल चालकको पहिचान तथा खोजी कार्यसमेत भइरहेको जिल्ला प्रहरी कार्यालय सुनसरीले जनाएको छ।