इनरुवा, ३ असार । भारतबाट भन्सार छलेर नेपालतर्फ ल्याउँदै गरिएको ठूलो परिमाणको भारतीय तरकारी सशस्त्र प्रहरीले बरामद गरेको छ।
सशस्त्र प्रहरी बल नेपाल नम्बर ४ गण हेडक्वाटर सुनसरीका अनुसार भोक्राहा–हाइवे सडक खण्डबाट २ हजार ५ सय ६० किलोग्राम परवल (६४ बोरा) बरामद गरिएको हो।
विशेष सूचनाका आधारमा खटिएको सशस्त्र प्रहरी टोलीले भारतबाट अवैध रूपमा भन्सार छली गरी ल्याइँदै गरेको उक्त परवल नियन्त्रणमा लिएको जनाएको छ।
बरामद गरिएको परवल आवश्यक अनुसन्धान तथा कानुनी कारबाहीका लागि सम्बन्धित भन्सार कार्यालयमा बुझाइएको सशस्त्र प्रहरी बल नम्बर ४ गण हेडक्वाटर सुनसरीले जनाएको छ।
सीमावर्ती क्षेत्रमा भन्सार छली तथा अवैध वस्तुको ओसारपसार नियन्त्रणका लागि निगरानी र सुरक्षा जाँचलाई थप प्रभावकारी बनाइएको सशस्त्र प्रहरीले जनाएको छ।