इनरुवा, २० असोज । नेपाली कांग्रेसको नयाँ केन्द्रीय नेतृत्व चयनका लागि आजदेखि औपचारिक निर्वाचन प्रक्रिया सुरु हुँदैछ।
कांग्रेस केन्द्रीय निर्वाचन समितिका अनुसार सभापति, उपसभापति र कोषाध्यक्षको प्रतिवेदन बन्दसत्रबाट अनुमोदन भएपछि आज बिहान १० बजेदेखि दिउँसो ३ बजेसम्म उम्मेदवारी मनोनयन दर्ता गरिनेछ।
आजै अपराह्न उम्मेदवारको प्रारम्भिक नामावली प्रकाशन, दाबी–विरोध तथा साँझ ७ बजे दोस्रो नामावली प्रकाशन गर्ने निर्वाचन कार्यतालिका रहेको छ। असोज २१ गते बिहान उम्मेदवारी फिर्ता र अन्तिम नामावली प्रकाशन गरिनेछ। त्यसपछि उम्मेदवारलाई प्रचारप्रसारका लागि समय दिइनेछ।
यस महाधिवेशनबाट नेपाली कांग्रेसले वरिष्ठ उपसभापतिसहित २ सय ९७ सदस्यीय नयाँ केन्द्रीय कार्यसमिति चयन गर्दैछ। संशोधित विधानअनुसार एक सभापति, एक वरिष्ठ उपसभापति र एक महिलासहित चार उपसभापति निर्वाचित हुने व्यवस्था छ।
निर्वाचन कार्यतालिकाअनुसार असोज २२ गते बिहान ७ बजेदेखि साँझ ५ बजेसम्म मतदान हुनेछ। मतदानका लागि काठमाडौंमा तीन स्थानमा केन्द्र तोकिएको छ।
कोशी, मधेस, कर्णाली र सुदूरपश्चिम प्रदेशका साथै भ्रातृ, शुभेच्छुक संस्था र जनसम्पर्क समितिका प्रतिनिधिका लागि काठमाडौंको खुलामञ्चमा मतदान केन्द्र रहनेछ। बागमती प्रदेशका प्रतिनिधिले राष्ट्रिय सभागृह तथा गण्डकी र लुम्बिनी प्रदेशका प्रतिनिधिले प्रज्ञा भवनमा मतदान गर्नेछन्।
विद्युतीय मेसिनको सट्टा मतपत्रबाट मतदान गराउने तयारी गरिएको छ। मतदान सकिएलगत्तै मतगणना सुरु गर्ने निर्वाचन समितिको तयारी छ।