इनरुवा, २० असोज । सुनसरीको बर्जु गाउँपालिकाबाट प्रहरीले अवैध रूपमा ल्याइएको ठूलो परिमाणको तरबुजाको बीउ बरामद गरेको छ।

इलाका प्रहरी कार्यालय दुहवी, इलाका प्रहरी कार्यालय सीतागञ्ज र ट्राफिक प्रहरी पोष्ट दुहवीबाट संयुक्त रूपमा खटिएको प्रहरी टोलीले बर्जु गाउँपालिका–२ केशलिया खोला नजिक विराटनगर–देवानगञ्ज सडकखण्डमा सार्वजनिक सवारीसाधन चेकजाँच गर्ने क्रममा उक्त बीउ बरामद गरेको हो।

प्रहरीका अनुसार सोमवार साँझ करिब ५ः३० बजे चेकजाँचका क्रममा अवैध रूपमा ल्याइएको ३८ बोरा तरबुजाको बीउ फेला परेको थियो। बरामद गरिएको बीउको तौल १ हजार ५ सय २० किलोग्राम रहेको छ।

बरामद बीउको अनुमानित मूल्य १५ लाख २० हजार रुपैयाँ रहेको प्रहरीले जनाएको छ।

बरामद गरिएको तरबुजाको बीउ इलाका प्रहरी कार्यालय दुहवीमा ल्याइएको छ। आवश्यक कानुनी कारबाहीका लागि उक्त बीउलाई सुनसरी भन्सार कार्यालय सेतुबन्ध पठाउने तयारी भइरहेको प्रहरीले जनाएको छ।